أنا خايفة بجد !!

كتير جدا لما بامسك القلم ممكن أجري وأجري وأجري واكتشف اني بعيدة 
 في أعلى قمة جبل (افرست) حواليا تلج وخوف ووحدة..
 
 وسعات القى نفسي في صحراء اتكاما عارفينها؟؟؟
 دي موجودة في تشيلي والارجنتين
 
ومن حواليا صوت الافاعي أعلى من صوت رقصة التانجو 
 وحركة الريح أسرع من الرمل وهو مخلوط بالشمس الخايفة من الليل..
 
وسعات باحس الألم في الضحكة.. 
والأمل في الدمعة.. والتفاؤل في الانتظار.. 

صحيح الموج في بلدنا مش بيزورها من زماااااااااااااااان 
من ساعة ما ردموا البحيرة... لكن انا مش ناسية لعبنا بالرملة على الشط ...
الشط اللى حولوه لغابات من البيوت والحجارة بتحجب الحياة قبل المية 
 وتحجب معاها صوت اغنية لكورال مدرسة البنات !!...

لكن لسة ريحة الياسمين بتملا المكان في حديقة المكتبة القديمة ..
والبنفسج بلون الحبر وزقزقة العصافير مكتوبة في ورقة على الشجرة ..

الصوت حروف ... الصريخ مد الألف في الوريد ...
والضحكة هاء مسحوب منها الروح على الورق 
القلم ... سيف بيحارب ويحبس اللسان ... 
القلم حلم بيتكرر كتير لكن صعب تفسيره بالكلام ....
كتير وانا باتكلم مع صحباتي ... اتمنى اروح بيتنا اسجل الردود بالقلم... 
اقولهم انا مش خجولة وخايفة ... انا مش طيبة وساذجة !! 
لكن مفيش قلم وقت الكلام مفيش إلا حبل الصوت 

مخنوق بيخرج طريد شريد 
يستجدي من القلم رحمة وزحمة ... شراع وشعاع ...فجر وصبر... ...
ونلف في ساقية الحياة ... طاحونة بتدور من سيبريا ..لـ تسونامي .... 
ومع أول حركة للريح يغير الشراع المسار (مرحبا بكم في الغربة) !!... 
ونريح على شط الوحدة ما بين مجموعة أسلاك ... بتمد القلب بالحياة الآلية ...
نت تكييف خلاط بيعصر عمرنا.....تلفزيون كئيب كذاب .

لكن فيه اتنين ملايكة مغمضين عنيهم نور ورنا !!
ويفضل حبل الحروف يخنق في حبل الكلام وريحة الحبر بتغير المعنى أسرع من مخارج الصوت... يااااااااااااااه....... هنااااااااااااااك .....أناااااااااااااااااااا.....سرااااااااااب 
انتى بتضحكي ؟؟... وانا هكتبلك ضحكة ف جملة منطقهاش.... 
طب بتعيطي ؟؟ وانا هرد عليكي بسطر يعيش وياكي وانا ساكتة....
أكيد بتحلمي ؟؟ انا ممكن اسجل دفتر حلمك ..بس من غير صوت !!...

أصوات بتتخانق بتتسابق على اللى يوصل الأول من دفتر الذكريات 
هاتي الطبق - اخرس يا خاااااااالد - اعمليلي كوباية شاي - الأتوبيس الساعة كام - قبليني في المدينة الجامعية - يا دبلة الخطوبة - وحشتيني ! - حطها في عنيك -
يا مامااااااااااا - بكرة تشوفيه عريس - بنتك مش حلوة ليه ؟ - أنا مسافر - رجلي على رجلك - على الركاب ربط الأحزمة والامتناع عن التدخين و.. و.. و..

ياه جسمي ارتعش ... مش من الخوف المرة دي !! دا صوت تليفوني بيرن حد واصل بعد دقايق هبدأ أحضر العشا واكمل مسلسل الحياة من غير قلم ... ومن غير دفتر !!