باسم يوسف: لهذا "معدتش أتكلم عاللي بيحصل في البلد"

كشف الإعلامي المصري الساخر باسم يوسف، عن السبب الذي دعاه إلى العزوف عن الحديث في الشأن المصري.

يوسف، عبر منشور مطول في صفحته الرسمية على "فيسبوك"، قال: "بعد تيران و صنافير ماعدش ليا أي رغبة في أي حاجة. الأرض اتباعت واللي قال عليها مصرية اتحبس، واللي رفع أعلام السعودية اتشال ع الراس. بعد كده ماعادتش حاجة تهم بصراحة وقلت ساعتها أنا زي ناس كتير اتكسرت من جوه وخلاص أنا حطيت البلد دي ورا ضهري".

وأضاف باسم يوسف: "تحية كبيرة جدا للي بيناضل وبيعافر وبيتكلم، أنا خلاص ماعدش فيا نفس ولا رغبة. أنا وعيلتي والمقربين ليا اتفشخوا بما فيه الكفاية إني أفضل أناضل ع الفيس بوك عشان ناس مالهاش ذنب تتأذى بسببي. ليه مش باتكلم ع المعتقلين؟ أتكلم عن مين ولا مين؟ وهل الهاشتاجات دي بقى ليها أي لازمة؟ إحنا بنكلم بعض وبنحسس إننا بنعمل فرق بس إحنا لسه بنتخانق بنفس أدوات 2011".

وتابع: "وعن تجربة وعن معرفة ناس اتأذت والعند زاد لما أنا كتبت عنهم من منطلق (آه دا إنت باسم يوسف كتب عنك) فبصراحة أنا بقيت أذية مش حل. وفيه ناس في الحبس أهاليهم طلبوا بشكل واضح عدم الكتابة عنهم عشان ما يتأذوش. ليه بقول الكلام ده دلوقتي وإيه علاقته بكأس العالم؟ عشان اللي بيحصل هناك هو صورة مصغرة لكل حاجة مقرفة سببها نظام السيسي".

وأردف قائلا: "جهاز الكفتة هو عنوان الفشل للنظام ده. اللي هو الفشل ببجاجة وعدم التعرض للمساءلة. طبق ده على كل حاجة في آخر أربع سنين: الفشل وعدم التعرض للمحاسبة لأن مين ده اللي حيحاسب الجيش. طبق ده على كأس العالم: كمية الفضايح اللي ابتدت من مصر، لغاية ليه المنتخب اختار أبعد مدينة عن الماتشات عشان يوفروا فلوس الإعاشة اللي واخدينها من الفيفا وفي المقابل أجهد اللاعبين في طبران طويل غير مبرر لموضوع تطليع فنانين كسر ما يساعدوش في الدعاية لصابون نابلسي شاهين بفلوس شركة حكومية في نفس يوم رفع الدعم الحكومي عن الفقرا بس مش مشكلة ندعم ناس مقتدرة تسافر (تشجع)".

وبحسب باسم يوسف، فإن "الفشل في كأس العالم ده يدرس عشان ده مش مجرد فشل الحكومة بتفشل كالعادة، لا، هنا إنجاز الصعود لكأس العالم كانت بأقدام ناس زي صلاح ماخدش حاجة من البلد وبرضه النظام عرف يبوظ الإنجاز ده واهو بيبهدل أحسن لاعب عندنا ومدخلينه في أمور سياسية مالهاش لازمة زي موضوع رمضان قديروف سفاح الشيشان. والموضوع ده ابتدى يأثر عليه إعلاميا في إنجلترا".

وقال باسم يوسف إن "كل ده يثبت إن مافيش فعلا فايدة إن الواحد يحرق دمه على نظام فاشل ومدمن للفشل من 1952".

وختم قائلا: "أنا يـئست ومركز في حياتي هنا ومش عايز إني أتكلم في اللي بيحصل في مصر. أنا اتبهدلت بما فيه الكفاية نفسيا وماديا واجتماعيا في آخر أربع سنين وحتى ما قلتش على تفاصيل كتيرة حصلتلي. وبصراحة مش قادر أدفع الفاتورة أكتر من كده. لو حضرتك محبط مني أو بتزايد عليا، اطلع من صحفتي لإني مش محتاج مزايدتك ونضالك المجاني في حياتي. فيه ناس اتبهدلت فعلا ومحبوسة لغاية دلوقتي وللأسف الناس بتفضل وراك وتزايد عليك وهما قاعدين على تليفوناتهم ومش حيستريحوا إلا لما الكل يبقى محبوس عشان يبقى (راجل بجد) وبعدين يعملولهم هاشتاج".