50 ألف جنيه وحبس 6 أشهر لطالب ثانوي بتهمة التسريبات بمصر

دشن النشطاء على مواقع التواصل الاجتماعي حملة تضامنية مع أحد طلاب الثانوية العامة بالمنوفية، في مصر، بعد قوله إنه تعرض للظلم على يد إدارة وأمن مدرسته، وتلفيق تهمة غش وتسريب الامتحانات له.

فعبر وسم #متضامن_مع_الشافعي، وصفحات مناوئة لسياسة وزارة التربية والتعليم، تداول النشطاء قصة الشاب عبد الله محمد الشافعي من مدرسة الفاروق عمر الثانوية بمحافظة المنوفية (وسط). وتفاعلت أيضا صفحة "شاومينج بيغشش ثانوية عامة" الشهيرة، والتي تم عبرها تسريب معظم امتحانات الثانوية العامة، فأعلنت تضامنها مع الطالب قائلة: "ده طالب من الطلبة المحترمين اللي ضيعوا عليه سنته، انشرها وافضحهم".

وقالت الصفحة إن تفاعل النشطاء مع الشافعي دفع بأحد مسؤولي وزارة التعليم للحديث مع عبد الله. وتابعت: "من حوالي ساعة وكيلة وزير التربية والتعليم اتكلمت مع عبد الله واستفسرت منه عن اللي حصل ومتفهمة جدا للموقف وقالتله هنساعدك، وإن شاء الله يبقى كلامها جد والمشكلة تتحل".

50 ألف جنيه غرامة وحبس 6 أشهر وإلغاء امتحاناته

أما عبد الله فقد روى قصته قائلا: "كنت رايح امتحان التفاضل وكان معايا موبايل، وأنا داخل بتفتش شافوا الموبايل قالوا لي: (اتصرف فيه روح وديه أي حتة وتعالى) والساعة كانت 9".

وأردف: "المهم من هنا لهنا قالوا لي: (خلاص اقفله وحطه في جيبك) طلعت الامتحان الساعة 9:10، أخذت ورقة الامتحان وجاي أحل خلاص، لقيت بعدها بـ 8 دقائق جاي الأمن ومعاه الشرطة وجايين بيقولوا لي طلع الموبايل اللي معاك".

وتابع عبد الله: "طلعته وكان مقفول زي مقالوا لي تحت، المهم لاقتهم بيقولوا: (هو ده اللي بيسرب الامتحان وهو ده اللي صور الورقة) وعملوا فرح في اللجنة، المهم أنا قاعد في أول كرسي والمراقب قاعد في وشي، وبتكلم بقولهم: (أنا قاعد هنا والمستر في وشي إزاي هطلعه وأصور وكل ده إزاي؟ وأنا داخل مكملتش 10 دقائق واللجنة كلها تشهد)".

وأضاف:" قالوا لي: (جالنا إنذار من الوزارة إن في موبايل في المدرسة في اللجنة دي اللي هو أنت صورت الامتحان ونزلته) قلت لهم: (والله محصل)، قالوا لي: (إنت معاك موبايل ليه أساسا؟)، قلت لهم: (بطمن أهلي وجيت تحت قالوا لي روح اتصرف فيه ومكنش في وقت وبعد كدا قالوا لي اطلع بيه مقفول)، فأنكروا إن ده حصل".

وأردف الشافعي: "عملوا محضر غش وكانوا بيكتبوا فيه: (تم ضبط الطالب أثناء تصوير ورقة الامتحان)، قلت محصلش ورحت على الاستاذ اللي بيكتب المحضر قام أخذ المحضر وطلع يكتبه بره والأمن مسكني مش عايزني أتحرك ودخل الأستاذ وبيقول لي: (امضي)، قلت: (مش ماضي)، لقيت الكل عمال يقول: (امضي امضي وهما تحت في الكنترول هيفتحوا الموبايل ولو انت مصورتش حاجة مش هيحصل حاجة)، قلت طب اقرأ المكتوب، قالوا لي: (لا امضي خلص عشان الدوشة في اللجنة هتمضي ولا نلغي المادة بتعتك؟)".

وتابع: "مضيت ومكنش باقي بعد كل ده غير نص ساعة والوقت ضاع ومعرفتش أحل حاجة، خلصت امتحان ونزلت للراجل اللي قال لي ادخل بالموبايل، وقلت له: (مش حضرتك قولتلي ادخل بالموبايل بس مقفول؟ ممكن تيجي تقولهم كده)، قال لي: (وأنا اروح في داهية بسببك؟ الكلام ده محصلش)، دخلت جوه بتكلم مع رئيس اللجان وبقوله الموبايل فين؟ قال: (اتحجز ورايح مع ورقتك الوزارة)! قلت له إزاي وقعدت أشتم وأعلي في صوتي راحوا جايبين الأمن مطلعني بره المدرسة".

وقال: "روحت لقيتهم جابوه على النهار وموقع الوزارة واليوم السابع والحوار اتشهر وانتشر، فضلت ساكت لحد لما رحت الامتحان اللي بعده، قلت لهم: (مكتوب كذا كذا! وإن أنا صورت الامتحان! وأنا اللي بسرب الامتحانات!!) قالوا: (لا كل دا كلام اطلع كمل امتحاناتك عادي ومفيش حاجة) قلت لهم طب الموبايل؟ قالوا: (هيجي الامتحان اللي جاي ابقى تعالى خده)".

وواصل عبد الله الشافعي قائلا: "رحت الامتحان اللي بعده بسأل على الموبايل، قالوا لي: (انت اللي بتصور وبتسرب، وعايز تقول أي حاجة روح اتكلم في الوزارة) ومختش معاهم حق ولا باطل، ووصل لوالدي امبارح إن في فاكس من الوزارة اتبعت إلى إدارة السادات اللي هنا إنه هيتم إلغاء امتحاناتي كلها وحبسي مدة لا تقل عن 6 شهور وغرامة 50 ألف جنيه، حسبي الله ونعم الوكيل مش عارف أعمل إيه ولا أتكلم مع مين ولا أشتكي لمين ولا مين هيسمعني أصلا".

جدير بالذكر أن امتحانات الثانوية العامة قد تم تسريبها وتداولها مع نماذج الإجابات، بعد بدء الامتحانات بدقائق، عبر مواقع التواصل الاجتماعي، ما سبب حرجا شديدا لحكومة الانقلاب، خاصة مع استمرار تسريب الامتحانات، وتزايد تظاهرات الطلاب المحتجة على قرارات إلغاء عدد من الامتحانات؛ التي اتخذتها وزارة التعليم مؤخرا.